Newidiadau Cyffrous Ar y Gweill ar gyfer Rhuthun
Mae yna fwrlwm gwirioneddol i’w deimlo yn Rhuthun wrth i welliannau mawr ddechrau ar sgwâr y dref a’r ardaloedd o amgylch. O ganlyniad i Gronfa Adfywio Lleol Llywodraeth y DU mae Cyngor Sir Ddinbych yn cyflawni cyfres o brosiectau sydd wedi’u dylunio i ddiogelu treftadaeth Rhuthun, gwella mannau cyhoeddus, a’i gwneud yn haws ac yn fwy diogel i fynd o amgylch y dref ar droed neu ar feic.
Yn 2023 cadarnhaodd Llywodraeth y DU eu bwriad i ddarparu £10.95 miliwn o gyllid grant ar gyfer 10 o brosiectau cyfalaf sydd wedi eu hanelu at ddiogelu treftadaeth unigryw, lles a chymunedau gwledig Rhuthun. Mae’r cyllid wedi ei ddyfarnu ar gyfer prosiectau llwyddiannus sydd wedi eu cynnwys yng Ngorllewin Clwyd yn unig ac ni ellir ei gyfeirio at brosiectau eraill.
Bydd y gwaith arfaethedig yn ceisio ehangu’r posibiliadau ar gyfer cynnal digwyddiadau ac adfywio adeiladau a thirnodau hanesyddol i gefnogi hunaniaeth leol, gan hyrwyddo balchder mewn lle a rhoi hwb i ddelwedd y dref hefyd.
Pan fydd y gwaith wedi dechrau, mae un neges yn fwy pwysig nag erioed:
Mae Rhuthun yn sicr ar agor ar gyfer busnes.
Mae siopau, caffis, marchnadoedd ac atyniadau yn masnachu fel arfer – ac mae eich cefnogaeth barhaus yn gwneud gwahaniaeth mawr.
Pa Welliannau sydd Ar y Ffordd?
Trawsnewid Sgwâr Sant Pedr
Bydd un o’r newidiadau mwyaf y byddwch yn ei weld yn Sgwâr Sant Pedr, a fydd yn cael ei ailddylunio yn ystyriol i greu gofod mwy croesawgar, hyblyg a sy’n addas i gerddwyr. Mae hyn yn cynnwys:
- Tynnu’r gylchfan i greu ardal ymgynnull fwy ger Tŵr y Cloc
- Man ar gyfer seddi caffi awyr agored a digwyddiadau cymunedol
- Gwell cysylltiadau teithio llesol, gan gynnwys gwneud Stryd y Farchnad yn stryd unffordd ar gyfer cerbydau tra’n cadw llwybrau beicio a cherdded dwyffordd
Mae’r holl ddiweddariadau hyn yn ymwneud â dathlu beth sy’n gwneud Rhuthun yn arbennig tra’n rhoi teimlad ffres a modern i’r canol.
Gwelliannau i Stryd y Farchnad
Mae Stryd y Farchnad hefyd yn cael gweddnewidiad gyda phalmant newydd a fydd yn gwneud y stryd yn fwy diogel i gerddwyr. Mae’r newidiadau hyn wedi eu cynllunio i wneud Rhuthun yn fwy apelgar a hygyrch.
Mae adborth y cyhoedd wedi bod yn gadarnhaol gyda’r rhan fwyaf o ymatebwyr yn dweud y bydd y cynlluniau yn gwneud canol y dref yn fwy diogel ac yn fwy deniadol.
Gwelliannau Parc Cae Ddôl
Bydd gwelliannau hefyd i Barc Cae Ddôl gan gynnwys:
- Plannu blodau gwyllt
- Adnewyddu toiledau
- Pontydd a llwybrau newydd
- Trac newydd ar gyfer beiciau a sgwteri
- Offer campfa awyr agored
Nod y newidiadau hyn fydd creu parc a fydd hyd yn oed yn fwy pleserus ar gyfer teuluoedd, cerddwyr a’r rhai hynny sy’n mwynhau bod yn yr awyr agored.
Adfer Tŵr y Cloc (eisoes wedi’i gwblhau)
Efallai eich bod eisoes wedi sylwi ar Dŵr Cloc Rhuthun sydd wedi ei adfer yn hyfryd, gyda gwaith adnewyddu wedi ei wneud o ran y garreg, wyneb y cloc a’r mecanwaith. Dyma un o lwyddiannau cynnar y Gronfa Ffyniant Bro ac fe ddaeth hyn â bywyd newydd i’r tirnod eiconig hwn.
Eglwys a Chlwystai Sant Pedr
Mae Cenhadaeth Dyffryn Clwyd yn cyflawni’r rhan hon o’r prosiect i wella’r Eglwys a’r Clwystai i gadw treftadaeth a hanes yr adeilad tra’n ei wneud yn fan mwy hygyrch i bawb.
Cefnogi Busnesau Lleol yn Ystod y Newidiadau
Fe wyddom y gall cyfnodau adeiladu arwain at amharu — ond mae busnesau Rhuthun ar agor fel arfer. OBR Construction sy’n cwblhau’r gwaith ac maent yn darparu swyddog cyswllt i gefnogi busnesau lleol yn ystod y cyfnod trawsnewid.
Dyma’r hyn y gallwch ei ddisgwyl:
- Bydd siopau a chaffis yn parhau ar agor trwy gydol y cyfnod lle cwblheir y gwaith
- Bydd mynediad i gerddwyr yn cael ei ganiatáu, gydag arwyddion clir
- Bydd parcio a mynediad ar gyfer danfon nwyddau yn parhau er gall rhai llwybrau gael eu haddasu
- Bydd digwyddiadau a marchnadoedd yn parhau i gael eu cynnal, gan wneud y mwyaf o’r mannau hyblyg newydd
A yw Prif Atyniadau Rhuthun yn Dal ar Agor?
Mae Canolfan Grefft Rhuthun yn parhau i weithredu fel arfer ac yn parhau ar agor i’r cyhoedd o Ddydd Mawrth i Ddydd Sul, 10:00–17:30, gyda mynediad rhad ac am ddim a pharcio ar y safle.
Mae’r arddangosfa gyfredol, gweithdai a digwyddiadau wedi eu rhestru ar eu gwefan.
Bydd Nantclwyd y Dre a Charchar Rhuthun yn ailagor i’r cyhoedd ddydd Sadwrn 28 Mawrth 2026. Cadwch lygad ar y cyfryngau cymdeithasol am fanylion digwyddiadau. Bydd rhan o grant y Gronfa Adfywio Lleol yn gwella’r cynnig yn Nantclwyd ymhellach drwy adnewyddu’r adain orllewinol a strwythur gardd deulawr bach o’r 18fed ganrif sy’n cael ei adnabod fel y tŷ haf. Yn y Carchar bydd llawr gwaelod 46 Stryd Clwyd yn dod yn fynedfa amlwg i’r Carchar a bydd gwelliannau o ran y swyddfa docynnau ac ardal y dderbynfa, caffi, mannau arddangos ychwanegol a man ymchwil cyhoeddus ar gyfer Archifau Gogledd Ddwyrain Cymru.
Castell Rhuthun– yn parhau ar agor i fusnes, mae’r gerddi hardd hefyd werth ymweld â nhw.
Edrych i’r dyfodol
Mae cymeriad a chyfaredd Rhuthun yn parhau yn greiddiol i’r cynlluniau hyn ac rydym yn llawn cyffro o weld y trawsnewidiad. Yn y cyfamser os oes angen ychydig o syniadau arnoch o ran llwybr cerdded lawrlwythwch ein llwybr tref. Mae yna nifer o siopau annibynnol a chaffis yn Rhuthun sy’n ei gwneud yn dref unigryw gyda phensaernïaeth ddiddorol sy’n rhychwantu canrifoedd ac yn rhoi gwir synnwyr o hanes i’r dref. Wrth i chi gerdded o amgylch y dref cadwch lygad am flychau bach sy’n rhan o Lwybr Celf Rhuthun i weld y dref o bersbectif gwahanol.
Hefyd cadarnhawyd y bydd Gŵyl Rhuthun yn parhau fel arfer ym mis Gorffennaf fel gall pawb fwynhau dod ynghyd ar y sgwâr gyda’r bandiau a’r perfformwyr eto i’w cadarnhau.
Erbyn diwedd 2026 bydd Sgwâr Sant Pedr, Stryd y Farchnad a’r dreflun yn ehangach wedi eu trawsnewid yn fannau mwy diogel, hygyrch a mwy deniadol — ac a fydd yn gweddu’n well i ddigwyddiadau, bywyd cymunedol a mwynhad bob dydd.
Daliwch ati i ymweld a chefnogi busnesau lleol gwych Rhuthun
Prynwch goffi, crwydrwch o amgylch y siopau annibynnol, ewch i gyfarfod ffrindiau yn y dref neu mwynhewch grwydro o amgylch Cae Ddôl. Mae pob ymweliad yn helpu i sicrhau fod Rhuthun yn ffynnu.
